Las Bastardas prestakuntza eta sorkuntzarako taldea da, performancea du ardatz eta narratiba eszeniko berriak sortzeko tresna gisa dihardu. 2015ean abiatu zen, La Karpinterían, hauen lankidetzari esker: Itziar Markiegi, Blanca Ortiga, Ramón Churruca, Myriam Petralanda, Jazmina Fuentes, Mari Cruz Planchuelo eta Espe López. 2016an bere bidea jarraituko du; beste toki batetik, baina izaerari eutsiko dio.

Performancea pertsona bat(zu)en jarduera egituratua da, zehaztugabea, ostera. Leku batean une jakin batean gertatzen den kontu jakina. Arte bizien inprobisaziotik eta poesia esperimentaletik gertuen dagoena. Teknikei heldu eta, teknika horiekin edo horien bitartez, egoera baten gauzatzea. Espazio bat, non espazioa guztia den eta denborak ekintza gidatzen duen. Gure gizarte pertsonaia alboratu eta besteen bitartez gure “ni” neutrora hurbiltzeko aukera. Mingaina askatzea, hizkera poetikoa erabiliz, ausardiaz eta ziurgabetasunez. Bada… horrela egin ezean, ez da emaitzarik egongo.